Skip Ribbon Commands
Skip to main content

Contact Private Wealth

Back

Email Private Wealth

Media Centre
 

​​​​U Ouer-generasie UA Bied Steeds Uitstekende Waarde

1 Junie 2018

Ouer-generasie uittree-annuïteite bied steeds baie waarde, veral in moeilike ekonomiese tye, skryf Phomolo Dube, Uitvoerende Hoof van Sanlam Geslote Boek.

​Net 6% van Suid-Afrikaners sal kommervry kan aftree en die leefstyl kan handhaaf waaraan hulle gewoond is. Dit is volgens die Nasionale Tesourie, wat ’n gebrek aan kliënte se begrip van aftreespaarprodukte as die vernaamste rede hiervoor aandui. Hulle is daarom geneig om beleggingsfoute op pad na aftrede te maak.

Aangesien mense ook deesdae langer leef, danksy vooruitgang in mediese tegnologie, is ’n behoorlike aftreestrategie noodsaaklik.

Daar is ’n persepsie in sommige sektore van die mark dat ouer-generasie produkte of sogenaamde ouer-generasie produkte (of dit nou uittree-annuïteite, uitkeerpolisse of ander produktipes is) swak waarde vir kliënte bied. Hierdie beskouing is egter onverdiend, veral in die geval van Sanlam se Gelykmatige Bonusfonds-UA’s. (Dieselfde geld vir ons ander ouer-generasie produkte afgesien van UA’s.)

Aftreefondslede het die laaste paar jaar een van die mees volatiele beleggingstydperke in die geskiedenis beleef, en baie lede voel tereg onseker oor hul beleggingskeuses. Dis nie nou die tyd om paniekerig te raak nie, maar eerder om die voordele en waarde wat dié ouer-generasie planne bied, deeglik te oorweeg.

Beskerming teen markonbestendigheid

’n Groot aantal Sanlam ouer-generasie UA-fondse het ’n onderliggende belegging in ‘gladgestrykte’ of Gelykmatige Bonusfondse, wat beteken lede trek deur gereelde bonusverklarings voordeel uit die onderliggende portefeulje se beleggingsopbrengs. In gelykmatige bonusportefeuljes word beleggingsopbrengs deur middel van gereelde bonusverklarings gladgestryk.

Dit het stabiele en betroubare beleggingsopbrengste tot gevolg, en verlig die tuimeltreinrit wat beleggers in markgekoppelde portefeuljes kan beleef. Dink maar aan die wêreldwye finansiële krisis in 2008.

Hierdie bonusverklarings word gegrond op die opbrengs wat op die portefeulje se onderliggende beleggings behaal word. Van die opbrengs word egter in tye van sterk markgroei opsygesit om in tye van swakker prestasie aangewend te word sodat dit opbrengste kan verhoog.

Dié reserwe word dan gebruik om in tye van swakker opbrengs hoër bonusse te verklaar. Ons Gelykmatige Bonus-portefeuljes het hul waarde gedurende die wêreldwye finansiële krisis in 2008 gewys deur die moeilike marktoestande bedrewe te navigeer en aftreefondslede gemoedsrus te gee.

Kliënteverwagtinge bestuur

Dié gladstrykmeganisme help om kliënte se verwagtinge te bestuur. Dit bied hulle ’n dubbele voordeel omdat dit hulle help om hul geld te groei wanneer markte goed vaar en die uitwerking van lae opbrengs tydens markafswaaie te beheer.

Onthou dat gladstryking net die tydsberekening van die vrystelling van beleggingsopbrengs verander en nie die opbrengs verminder of vermeerder nie. Die bonusse behoort met verloop van tyd ’n soortgelyke opbrengs aan dié van die onderliggende belegging in die fonds te lewer.

Dit bied ’n puik opsie vir kliënte wat bestendige groei oor tyd verkies, eerder as om hulself bloot te stel aan die uiterstes van produkte wat volledig markverwant is. In markafswaaie verklaar hierdie portefeuljes dikwels steeds goeie bonusse op grond van die oorskotte wat voor die afswaai opgebou is.

Sanlam se Gelykmatige Bonus-portefeuljes het ook op langtermyn die inflasiekoers aansienlik geklop, en sodoende reële opbrengste aan ons kliënte verskaf.

Ingeboude waarborge

Die voordeelbetalings van ons Gelykmatige Bonus-produkte word by uitkering (of die opsiedatum) en dood op die boekwaarde van die betrokke polis gegrond, ongeag die heersende marktoestande.

Die boekwaarde word bereken deur die netto bydraes met verklaarde bonusse te laat oploop. Afhangend van die produk, kan die bonusse vestigend, nievestigend of ’n kombinasie van vestigend en nievestigend wees. Verklaarde vestigende bonusse kan nie vir uitkering (of opsiedatum) of doodseise verwyder of verminder word nie, wat dus ingeboude waarborge tot voordeel van die kliënt bied.

Sommige van die polisse het bykomende beleggingswaarborge by uitkering. Waar toepaslik, word die gewaarborgde bedrag bereken deur die netto bydraes teen ’n kontraktuele minimum koers te akkumuleer. As die gewaarborgde bedrag die boekwaarde oorskry, sal die verskil deur Sanlam se aandeelhouers betaal word.

Hoe gladstryking lede bevoordeel

  • Gladstryking verminder blootstelling aan korttermyn-markvolatiliteit.
  • Dit verminder die risiko van belegging in of die onttrekking van beleggings aan die mark op die verkeerde tyd vanweë omstandighede buite ’n lid se beheer, byvoorbeeld aftrede of uitdiensstelling.
  • Dit beskerm lede se kapitaal en is geskik vir lede wat na aan aftrede is, of wie se werk kwesbaar is vir ekonomiese veranderings, asook diegene met ’n konserwatiewe tot gematigde risikoprofiel.

’n Praktiese voorbeeld van gladstryk-voordele

Die blou lyn in die onderstaande grafiek is een van Sanlam se Gelykmatige Bonusfondse en die oranje lyn ’n gemiddelde Gebalanseerde Fonds. As Ben byvoorbeeld in ’n gemiddelde Gebalanseerde Fonds belê het en ses maande later aftree gedurende ’n markafswaai, soos Jake, sal sy aftreespaargeld vanweë markonderprestasie aansienlik laer wees.

Maar as Ben in ’n gelykmatige bonus-produk (die blou lyn) belê het, sal albei kliënte uit kapitaalbeskerming voordeel trek. Jake is egter in hierdie geval in ’n beter posisie wanneer hy aftree vanweë die kapitaalbeskerming wat gladstryking bied.

Dit wys hoe belangrik die regte keuses vir aftreebeplanning is. Baie kliënte kán voordeel uit gladgestrykte bonustipe-produkte trek, wat die persepsie dat die opbrengste van ouer-generasie produkte swak waarde bied verkeerd bewys.

​​​​
Sanlam Life Insurance is a licensed financial service provider.
Copyright © Sanlam