Skip Ribbon Commands
Skip to main content

Contact Private Wealth

Back

Email Private Wealth

Media Centre
 

​​​​​​​​​​​​​​​​​​​Verstaan jou Mediese Fonds

Deur Martin Neethling, 1 Junie 2018

Vir die meeste Suid-Afrikaners is mediese dekking hul tweede hoogste maandelikse uitgawe. Daar word geraam dat ’n hospitaalplan gemiddeld R1 600 vir ’n hooflid kan kos, wat 13.5% van die gemiddelde SA salaris bedra.

Gapingsdekking kos ongeveer R200 tot R400 per maand. Voeg hierby enige selfbefondsde dag-tot-dag-uitgawes of ’n meer omvattende mediese skema-opsie, en dit beteken selfs nog ’n groter deel van die salaris word net aan mediese dekking bestee.

Martin Neethling, Besigheidshoof by Sanlam Gesondheidsorgkonsultante, sê mense betaal baie vir hul mediese skema, maar moet dikwels nog steeds vir beduidende tekorte opdok wanneer hulle in die hospitaal opgeneem word of duur behandeling buite die hospitaal nodig het. “Daar is talle produkte en verskaffers om van te kies, almal met ingewikkelde inligting en verwarrende dekkingsvoorwaardes. Daarom word aanbeveel dat mense hul mediese dekking-opsies jaarliks in oorleg met ’n gesondheids-geakkrediteerde finansiële beplanner hersien om seker te maak dat hul voordele met hul gesondheidsbehoeftes en huidige finansiële situasie tred hou.”

“In Suid-Afrika is daar 82 verskillende mediese skemas. Elkeen van hierdie skemas het ’n aantal opsies waaruit lede kan kies. En as hospitaal-kontantterugplanne, gapingsdekking en primêre gesondheidsversekering hierby gevoeg word, kan dit verwarrend wees om te onderskei wat noodsaaklik is. Jou finansiële beplanner ken jou, jou mediese behoeftes en jou holistiese finansiële profiel. Die beplanner kan objektiewe leiding gee oor watter polisse in elke fase van jou lewe die geskikste is. Indien jou finansiële adviseur nie geakkrediteer is om advies oor mediese fondse te verskaf nie, kan hy of sy jou na ’n gesondheidsorgkonsultant verwys wat ’n beter begrip het van die voordele wat elke mediese skema-opsie aanbied.”

Vr​​ae om te vra wanneer mediese dekking hersien word

Wat is die risiko as ’n mens nie jou mediese skema-dekking hersien nie?

Hier’s ’n voorbeeld: hospitalisasie en spesialisbehandeling maak die grootste deel van mediese koste uit, volgens die Raad vir Mediese Skemas. Spesialiste en hospitale onderhandel tariewe op ’n individuele grondslag met verskillende skemas. Dit beteken ’n spesialis kan dubbeld die skematarief of nog meer vra, wat tot ’n moontlike tekort op baie vlakke kan lei. Mense aanvaar te dikwels dat hulle gedek word en het dan later ’n probleem wanneer hulle te groot tekorte moet dek of geen dekking het nie. Dit is belangrik om ’n 12-maandesiening te hê, en ’n adviseur te raadpleeg wat insig in die fyner bepalings het.

Hoekom moet ’n mens meer as een verskaffer oorweeg om jou gesondheidsorgbehoeftes te dek?

Die afbakeningsregulasies wat mediese gapingsdekking, hospitaalkontantplanne en primêre gesondheidsorg beheer, het in 2017 in werking getree. Dit verbied mediese skemas om hierdie produkte te verkoop, en omgekeerd. Mediese skemas word deur die Raad vir Mediese Skemas gereguleer, terwyl die ander produkte aan die Lang- en Korttermynversekeringswette onderworpe is. Elk van die produkte wat jy miskien nodig het om al jou gesondheidsorgbehoeftes te dek, het dus hul eie reëls, voordele en regulasies en hulle dek verskillende behoeftes.

Watter gesondheidsprodukte is noodsaaklik?

Hoe belangrik produkte is, sal afhang van jou gesondheidsorgbehoeftes en hoe bekostigbaar hulle vir jou is. ’n Omvattende opsie is die wenslikste, maar na gelang van jou of jou gesin se unieke behoeftes, kan uitgebreide voorskrifversamelings en prostesevoordele, tandheelkunde, optometrie of gespesialiseerde kosmetiese prosedures laer op jou gesondheidsorg-prioriteitslys wees.

Nie almal kan egter ’n mediese skema-opsie bekostig nie, of jou gesondheidsorgbehoeftes verg miskien nie al hierdie voordele nie. Die verskillende opsies vir iemand met ’n beperkte begroting of beperkte gesondheidsorgbehoeftes is:

  • Primêre gesondheidsorgversekering: Dit gee jou toegang tot mediese praktisyns en voorkomende sorg met onmiddellike behandeling wat die risiko van hospitalisasie en chroniese siektes beperk.
  • Gapingsdekking: Dit is bedoel as ’n aanvulling om die verskil te dek tussen wat diensverskaffers vra en wat die mediese skema betaal wanneer jy in die hospitaal opgeneem word. Daar word geraam dat minder as 10% van mediese skemalede gapingsdekking het. ’n Gebrek aan hierdie dekking kan finansies uitput en ’n sorgvuldig berekende finansiële plan ontwrig.

Wat betaal ek vir dit wat ek nie nodig het nie?

Party mense registreer die hele gesin op die duurste opsie, vir gemoedsrus “ingeval iets gebeur”. Dit beteken hulle kan betaal vir ryk voordele wat hulle nie nodig het nie of waarvoor hulle nie ’n ooglopende risiko het nie. Dit onderstreep weer eens die belangrikheid van ’n jaarlikse hersiening. Dit is beter om familielede met groter gesondheidsorgbehoeftes op ’n aparte plan te registreer, sodat die hele gesin nie uiteindelik meer betaal vir voordele waaraan nie almal ’n behoefte het nie. Bevestig egter dat jou verskaffer van gapingsdekking jou toelaat om een gapingsdekkingpolis uit te neem om familielede op verskillende mediese skemas te dek.

Sanlam Life Insurance is a licensed financial service provider.
Copyright © Sanlam